Barnakórinn

Kórinn æfir einu sinni í viku á mánudögum
kl. 17:00-17:50 í Hafnarfjarðarkirkju.
Börnin fá texta og nótnablöð til að taka með sér heim. Þannig geta foreldrar tekið þátt í æfa með börnunum texta laganna sem við æfum á kóræfingum. Gott er að setja blöðin í svokallaðar kórmöppur sem eru með harðri kápu og föstum plöstum í eða tveggja gata þunna möppu. Kórmöppuna þarf að koma með á æfingu til að geta tekið fullan þátt á æfingunni. Fyrir æfingar er gott að fara á salerni, taka húfur af kolli og fleygja tyggjói. Þannig spörum við tíma sem annars fer í þetta á æfingatíma. Þegar kórinn kemur fram er ætlast til að börnin séu snyrtileg til fara. Við erum ekki með sérstaka kórbúninga en erum í svörtum og/eða hvítum fötum að eigin vali. Svo er klæðnaðurinn stundum brotinn upp með rauðu fyrir jólin og sumarlit á vorin.

Unglingakórinn

Kórinn æfir tvisvar í viku á mánudögum kl. 18-19:30 og á fimmtudögum kl. 17:30-18:30 í kirkjunni.
Kórfélagar koma með svartar kórmöppur sem eru með föstum plöstum í. Í möppuna setja þeir texta og nótnablöð sem þeir geta tekið með sér heim eða geymt í kórskápnum okkar í kirkjunni. Muna þarf eftir kórmöppunni á æfingar til að geta tekið fullan þátt á æfingunni. Fyrir æfingar er gott að fara á salerni, taka húfur af kolli, fleygja tyggjói, slökkva á símum og ná í kórmöppur í kórskáp. Þannig spörum við tíma sem annars fer í þetta á æfingatíma. Þegar kórinn kemur fram er ætlast til að kórfélagar séu snyrtilegir til fara. Við erum ekki með sérstaka kórbúninga en erum í svörtum og/eða hvítum fötum að eigin vali. Svo er klæðnaðurinn stundum brotinn upp með rauðu fyrir jólin og sumarlit á vorin.

Uppákomur/mætingar

Eins og fram hefur komið kemur kórinn fram við hin ýmsu tækifæri innan kirkjunnar jafnt sem utan hennar. Ætlast er til að kórfélagar mæti á æfingar og þegar kórinn kemur fram nema um veikindi sé að ræða. Dagsskrá kóranna er auglýst í tíma á korar.is þannig er að hægt er að skipuleggja sig í tíma. Dagsskráin og erfiðleikastig laga er valið út frá þeim hóp kórfélaga sem þá og þegar er á skrá. Þannig á stjórnandinn að geta gert ráð fyrir að þeir sem stundi æfingar mæti einnig þegar kórinn komi fram. Kórastarf byggist á samvinnu og þess vegna þurfa að vera skýrar reglur um mætingar til að vinnan og ábyrgðin leggist jafnt yfir alla.

Margir innan kórsins eru með mikinn metnað í að gera sitt allra besta og fórna ýmsu fyrir það að byggja upp góðan kór. Leiðinlegt er fyrir þá sem mæta og standa sig alltaf vel ef dræm mæting er á viðburði eða æfingar sem mikið hefur verið æft fyrir.

Hlutverk foreldra

Áhersla er lögð á gott samstarf við foreldra í kórastarfinu enda hlutverk þeirra mikilvægt og margþætt. Þeirra er að sjá til þess að börnin mæti á æfingar og aðra auglýsta atburði. Að fylgjast með dagsskrá kóranna á korar.is og gera ráð fyrir æfingum og atburðum kóranna inn í dagsskrá fjölskyldunnar og skipuleggja sig eftir því. Að tilkynna veikindi eða önnur mikilvæg forföll með sms (taka þarf fram ástæðu forfalla í skilaboðum) Þá er einnig treyst á aðstoð foreldra t.d. í kringum æfingabúðir og/eða vorferða. Það hefur margoft sýnt sig að stuðningur foreldra með því að koma á tónleika, hvetja og styðja skiptir sköpum fyrir kórastarfið. Ef kórfélagi hættir í kórnum þarf að tilkynna til kórstjóra.

Uppbrot á kórastarfinu

Á hverju ári eru nokkur uppbrot á kórastarfinu. Árlega fer unglingakórinn í tveggja daga æfingabúðir sem eru mikilvægur hluti þess að hrista hópinn saman, bæði kórfélaga og foreldra sem og að æfa að kappi fyrir jólatörnina. Önnur uppbrot eru t.d. náttfatapartý, kóraheimsóknir og ofl. Að vori fara kórarnir annaðhvort í óvissuferð eða vorferð. Á nokkurra ára fresti hefur unglingakórinn farið í söngferðalag erlendis og er stefnt að næstu ferð vorið 2018.

Rekstur kórsins/kórgjald

Hafnarfjarðarkirkja sér um allan rekstur kórsins þ.e.a.s. borgar laun kórstjóra og undirleikara og sér kórnum fyrir aðstöðu. Einnig skaffar hún nótur, ljósritunaraðstöðu ofl. Kórfélagar í Barna-og unglingakór borga eitt kórgjald yfir veturinn sem er fyrir kostnaði af þeim uppbrotum sem eru í tengslum við kórinn t.d. þegar við höldum pizzuveislu, æfingadag/búðir, smá hressingu á æfingu og óvissuferð/vorferð.
Þátttaka í Barnakórnum er 5000 kr. og unglingakórnum 9000 kr. Gert er ráð fyrir að greiðslur berist eigi síðar en 15.september inn á reikning kórsins.
Rnr: 545-26-9076 og Kt: 590169-7069. Mikilvægt er að setja nafn barns í skýringu á millifærsluna.

Korar.is/facebook

Heimasíða kórsins er korar.is. Þar birtast allar helstu upplýsingar varðandi kórinn hverju sinni.
Foreldrar eru hvattir til að fylgjast þar með.
Á facebook er einnig síða undir nafni kórsins sem og lokaðir hópar, einn fyrir barnakórinn og annar fyrir unglingakórinn. Þar geta kórstjóri, kórfélagar og foreldrar sett inn upplýsingar, videóupptökur og fleira er varðar kórastarfið.

Barna-og unglingakór Hafnarfjarðarkirkju

Öll börn með áhuga á söng og tónlist eru velkomin í kórana. Kórarnir skiptast í tvo kóra Barnakór fyrir börn í 2.-6.bekk og Unglingakór fyrir ungmenni í 7. – 10. bekk.   Kórastarfið er í raun tónlistarnám, þar sem raddir barnanna eru þjálfaðar jafnt og þétt og reynt að byggja ofan á það, sem þau þegar kunna til að gera hvern og einn einstakling að góðum söngvara, því  er ekki mælt með að hætta og byrja aftur seinna. Í upphafi starfsársins er lagt fram skipulag og birt á korar.is í september fyrir haustönn og í janúar fyrir vorönn. Kórstjóri frá árinu 1995 með hléum er Helga Loftsdóttir og undirleikari kórsins frá árinu 2003 er Anna Magnúsdóttir. Undanfarin ár hafa að meðaltali 50-80 börn og unglingar tekið þátt í kórastarfinu ár hvert og hafa allmörg ungmenni útskrifast úr kórnum eftir þátttöku frá unga aldri. Skráning fer fram á heimasíðu kórsins, korar.is og er fyrsta kóræfing vetrar mánudaginn 29.ágúst.

Hlutverk kórsins

Hlutverk kórsins er að koma fram í kirkjunni við ýmis tækifæri og þá helst í fjölskylduguðþjónustum þar sem kórinn leiðir sönginn. Unglingakórinn tekur árlega þátt í jólavöku við kertaljós og Barna-og unglingakórarnir sjá um söng á annan dag jóla. Einnig taka kórarnir þátt í Syngjandi jólum í Hafnarborg og kóramóti hafnfirskra barnakóra í Víðistaðakirkju. Unglingakórinn hefur sungið með Frostrósum og Jólin alls staðar í Hörpu, Hafnarfjarðarkirkju og öðrum kirkjum landsins. Undanfarin ár hefur unglingakórinn tekið þátt í kirkjulistahátíð í Hallgrímskirkju ásamt öðrum tónlistarmönnum. Ár hvert heldur kórinn sjálfstæða Jóla og Vortónleika þar sem afrakstur starfsins eru gerð skil. Kórinn hefur heimsótt nokkra barna -og unglingakóra, tekið lagið með þeim og haldið tónleika sem og tekið á móti gestum.
Unglingakórinn hefur fimm sinnum lagt land undir fót og hefur Danmörk verið fyrir valinu þar til sumarið 2015 þegar Unglingakórinn fór í vel heppnaða söngferð til Ungverjalands.